شقيقة المتهم بقتل جواهرجي بولاق: حالة اتغير بعد الطلاق.. وإداني دبلة وخاتم
استكملت نيابة وسط القاهرة الكلية، التحقيقات في مقتل الخواجة حسني الخناجري، جواهرجي بولاق أبو العلا، في القضية رقم 514 لسنة 2024 إداري بولاق أبو العلا، حيث استمعت لأقوال المتهمه "فادية.
م" شقيقة المتهم.
وقالت "فادية.
م" 45 سنة- ربة منزل، خلال التحقيقات: "أمي ماتت من 35 سنة وأنا عندي عشر سنين وإحنا ست أخوات وأبويا اتجوز بعد ما أمي ماتت بشهر أو شهرين وأنا أكبر واحدة فيهم، وقعدت من المدرسة كنت بربيهم وأراعيهم وأخويا محمد كان في سنة رابعة ابتدائي لحد ما كبروا وأنا اتجوزت سنة 1994وما سبتهمش وأخويا ساب المدرسة واشتغل مع أبويا، وفضل شغال لحد ما اتجوز بنت عمه وبعدها خلعته".
وتابعت: "من ساعة ما أبويا مات ابتدت المشاكل، وابتدي ساعتها يخش في مشاكل بسبب إنه مش قادر على الالتزامات المادية وكان ينفق على شغل وما يكملش وابتدي يخش في مواضيع أنه يمضي على إيصالات أمانة ويبيع ممتلكات ابوه اللي هو ورثة وفضل عايش معايا من سنة 2021 ولما ميكونش معاه فلوس بساعده وكدة كدة بياكل ويشرب معانا، ولو عايز سجائر بجيبله وهو لما ساعات بيبقي معاه فلوس بيدينا بس نقطة التحول في حياته لما مي سابته وطلبت الطلاق، وبعدها حالته النفسية بقت وحشة".
وأضافت: "يوم 27 فبراير محمد جالى البيت لقيته بيقولي أنا مسافر حضريلي هدومى عشان عندى شغل في حتة في الصعيد ولقيته بيتكلم في التليفون وعرفت ساعتها إنه بيكلم حسن صاحبه وسمعته بيقول خلاص أنا هقابلك في شارع ناهية، وبعد كده إداني دبلة وخاتم وقالي أنا عايزك تبيعي الحاجات دي عشان نلحق نمشي وفعلًا سلمني دبلة وخاتم ونزلت عند مدحت بتاع الدهب وقولتله أنا عايزة أبيع الدبلة والخاتم، وقال ملهومش فاتورة قولتله لا ده واحد لسة متجوز عاوز يبيعها في شغل، ساعتها مدحت قالي بلاش نبيع دلوقتى عشان الذهب نزل قولتله لا أنا عاوزة ابيعهم عشان هو محتاجه في شغل، وبالفعل خدهم تمنهم وإداني مبلغ مالي عشرين ألف جنيه، ورجعت البيت وديت الفلوس لمحمد وإداني ألف ونص، وقالي أنا مسافر ولو عوزتي حاجة هبعتلك قولي بس لحسن وأنا هبعتلك، واناإن شاء الله قبل رمضان هبعتلك فلوس تجيبي حاجات للبيت وبعد كدة راح واخد بعضه ونزل وما شوفتهوش تاني لحد يوم الثلاثاء بليل، لقيته جالي وخبط عليا البيت فقولتله أنت ما سافرتش قالي أنا سافرت أسوان ورجعت في نفس اليوم وهمشي تاني ودخل نام لحد ما اتقبض علينا".
اقرأ أيضاً
مصر
2 قراءة) 
