من ذاكرة ماسبيرو.. "الشحرورة": شيلت فستاني وجريت مع فرقة هاني مهنا عشان ألحق فرح في لندن

من ذاكرة ماسبيرو.. "الشحرورة": شيلت فستاني وجريت مع فرقة هاني مهنا عشان ألحق فرح في لندن

في لقاء لها على شاشة التليفزيون المصري بالقناة الثانية مع المذيعة عفاف عبدالرازق من كواليس حفل العاملين بالإذاعة والتليفزيون مع المرحومة المطربة والفنانة اللبنانية صباح والحديث حول سفرها لأمريكا ولندن والحفلات التى أقيمت هناك مع بعض الفنانين للجالية العربية ورحلتها الفنية في لوس أنجلوس وباريس.

 قالت الفنانة صباح: سافرت إلى أمريكا وغنيت هناك للجالية العربية وكان معي الأستاذ محرم فؤاد وأحمد عدوية وسهير زكي وكانت حفلة مش بطالة والقائمون عليها كانوا مصريين من بلدنا، وكان المسرح كبيرا يسع أكثر من ٦ آلاف والحقيقة كنا متأملين النجاح أكثر في هذه الحفلة لأن أمريكا كانت محتاجة دعاية كتير مش سهل إن الواحد يعمل حفلة بره لأن في عدة اتجاهات وآراء والناس متفرقة شوية فكانت الحفلة صعبة علينا شوية لكن ماشي الحال وشوفنا متاعب كتير في الشغل والسفر، واضطريت بعد ماغنيت أشيل فستاني على إيدي وجريت أنا وفرقة أستاذ هاني مهنا عشان نلحق فرح في لندن كانت الحفلة يوم ٩ ويوم ١٠ كان الفرح وصلنا عليه على طول شيلت الفستان من الكيس لبسته ونزلت غنيت والفرقة كانوا مجهدين وتعبانين معهم حق لكن أنا قلتلهم شفتوا أنا بغنى وأنا واقفة أنا أحسن منكم.

 وبعد ذلك ذهبت إلى باريس وصورت فيديو للتليفزيون وفي لندن وأمريكا كنت بصحى كل يوم من ٨ صباحا، وكان التصوير خارج الاستوديوهات في أماكن سياحية ومحلات معروفة وأتمنى النجاح.

 وقدمت أغاني سلطان و٣ أغان قديمة وصورت في ديزني لاند للأطفال حبيبة أمها وأكلك منين يابطة وأمورتي الحلوة.

 وواصلت أنني سافرت عدة مرات ومافيش حاجة ماشفتهاش في لندن اتفرجت على مسرحية اليزبث تايلور طبعا هي اسمها كبير وكل حاجة لكن عادية ومش اد الدعاية بتاعتها فكرتها اتعملت كتير واحدة عايزة زوجها يموت عشان تاخد فلوسه وتقوله كده في وشه عايزاك تموت عشان اخد الفلوس يعني عادي والديكور عادي والحوار كتير لكن الفنان الذي يدخل قلوب الناس ويبقى سنين الناس تفضل تحبه أنا حتى لغاية السن ده لم أغير اللون بتاعي مثلا هأغنى اليوم أغنية أنا كده دلوعة ممكن الناس تقول هى صباح كبيرة في السن وتقول أنا دلوعة لكن من يوم ما ابتديت وأنا بدلع فلم أحس بالوقت ولا أى حاجة والناس بتحبنى وأنا عملت كمان غنوة كلاسيكى للتنويع لكن الغنوة الطويلة مش لي كانت حلوة للمرحومة أم كلثوم وكانت لاقيه لها الحكاية دى وكل فنان لو يعرف يليق عليه إيه كان ينجح أنا عارفه لايق عليا إيه والحمد لله ناجحة باللون ده جدًا وهناك مطربات صوتهم حلو وبحبهم لكن لم أفضل أحد على أم كلثوم أنا بحب كل الناس وماعنديش كره أبدا لحد.

 واختتمت: يوجد لدينا في مصر فنانون ومخرجون رائعون وأفكار حلوة لكن ينقصنا الحماس للإبداع في الاستعراضات مثل الخارج في إمكانياتهم لكن يجوز الناس هذه الأيام لا تميل للاستعراضات بتميل للمسرحيات المرحة عشان ينبسطوا والأفلام الاستعراضية كانت زمان وتقريبا انتهت ولو قدمت بشكل جيد سوف يكون عليها إقبال من الجماهير بإذن الله.

واليوم في حفل العاملين بالإذاعة والتليفزيون هاغني الدلوعة لبرطيشه وسلطان ولا يا قلبي لجمال سلامة ومحمد حمزة وهاشوف الناس هاتطلب إيه وأنا تحت أمرهم وفرقة هانى مهنا كبيرة ومهمة وحافظين كل شغلي بقى في دمهم.

مصر      |      المصدر: البوابة نيوز    (منذ: 4 سنوات | 31 قراءة)
.